Akuzohet për 55 vepra penale
Në mëngjesin e së premtes së 21 shkurtit, policia e Kosovës ka arrestuar Sahit Halitin nga fshati Jezerc Komuna e Ferizajt, i cili akuzohet nga Prokuroria Themelore në Ferizaj për 55 vepra penale që të gjitha për vjedhje të pyllit.
Sipas Kodit Penal të Kosovës, vepra penale Vjedhje e pylli dënohet me gjobë dhe burgim deri në tre vjet, varësisht nga mënyra e kryerjes dhe sasia e drusore e prerë.
Sipas gjykatës, përkundër thirrjeve që të paraqitet në këtë institucion Sahit Haliti nuk u është përgjigjur autoriteteve, andaj ndaj tij ka pasur edhe fletarrest.
I pandehuri Haliti i tha monitoruesit të BIRN-it, se me shitjen e druve i mban 9 anëtarë të familjes.
“Nuk kam të ardhura tjera, nuk kam ka t’ia mbaj”, u shpreh Haliti.
Bashkë me Sahit Halitin, Policia e Kosovës ka arrestuar edhe 14 të akuzuar të tjerë për vjedhje pylli, derisa 6 prej tyre janë liruar, sepse kanë paguar dënimet e shqiptuara nga gjykata.
Nëntë të akuzuarit tjerë gjykata i ka dërguar në paraburgim.